Hvernig temjum við okkur
glaðværð?
Við gerum allt sem við tökum okkur fyrir hendur með glöðu hjarta. Leyfum ekki
neikvæðum hugsunum að komast að. Njótum góðu hlutanna sem gerast. Þegar
erfiðleikar steðja að leyfum þá áhyggjunum og sorginni að koma en leyfum þeim líka að fara.
Hugsum jákvætt um allt sem gerist og reynum að læra af því og horfa á björtu hliðarnar. Verum glöð og leyfum kímnigáfunni að njóta sín. Hlátur er hollur
fyrir sálina og eflir glaðværðina. :)
 

Sæl og blessuð ;)
Nú er aldeilis margt um að vera hjá okkur næstu daga.

Á morgun fimmtudag 27. október, er alþjóðlegi bangsadagurinn. Þá mega börnin taka með sér bangsa í leikskólann og leyfa honum að taka þátt í starfinu með okkur ;) Muna bara hófsemina í fjölda bangsa.

Á föstudaginn er Sólargleði. Í samveru í vikunni sem leið komu börnin með uppástungur að Sólargleði og völdu kennarar Álfadeildar svo þrennt af þeim lista: Rugludagur, Búningadagur og Tónlistardagur.
Börnin fóru svo eitt í einu fram til Sigþóru þar sem þau kusu það sem þau helst vildu gera í Sólargleði. Atkvæðin fóru sem hér segir:
Tónlistardagur 2 atkvæði
Rugludagur 6 atkvæði
Búningadagur 8 atkvæði
Á föstudaginn 28. október verður því búningadagur hjá okkur í Sólargleði ;)

Þriðjudaginn næstkomandi verður svo Síðusel 30 ára.
Munu kennarar bjóða börnunum upp á heimagerða leiksýningu um morgunin en svo eftir hádegi eða frá kl. 14-16 munu börnin bjóða fjölskyldum sínum til kaffisamsætis í leikskólanum.
Hlökkum til að sjá ykkur.
Kveðja kennarar Álfadeildar
 

10.júní
Þessa dagana erum við að undirbúa fagnað fyrir 16. júní en þá ætlum við að hitta vinaleikskólana okkar: Sunnuból og Krógaból við Síðuskóla og syngja þar saman söngva á hól í tilefni af þjóðhátíðardegi okkar 17. júní.
Eins og flestir hafa orðið varir við urðum við sökum ónærgætni náttúrunar að fresta fyrirhugaðri ferð okkar í Naustaborgir en við ætlum okkur að fara þangað um leið og skipulag leyfir og veðrið verður okkur hagstætt.
Kveðja kennarar Álfadeildar
 

Sumar
Þá hefur sumarskipulag tekið við á Álfadeild (sjá í fataherbergi) en það gildir til 15. september.
Nú eykst sá tími sem við dveljum úti í takt við hækkandi sól og vonandi hlýnandi veður. Börnin fara einnig meira í val þegar við erum inni. Í sumar getum við átt það til að stökkva af stað í ferðir án mikils fyrirvara og því mikilvægt að fylgjast vel með töflunni í fataherberginu og eins tölvupósti (getum líka skellt okkur af stað að morgni dags án nokkurs fyrirvara og skiljum þá eftir símanúmer á töflu).
Nú erum við að kveðja elstu börnin okkar sem eru að hverfa á braut og takast á við næsta skólastig og kveðjum við þau með söknuði og óskum þeim og fjölskyldum þeirra velfarnaðar í framtíðinni. Einnig tökum við á móti börnum af Trölladeild eftir sumarfrí og hlökkum til að vinna með þeim og fjölskyldum þeirra.
Kveðja kennarar Álfadeildar
 

Skemmtiferð í Naustaborgir
Kæru foreldrar
Við kennarar Álfadeildar erum að velta fyrir okkur hvort börnin ykkar hefðu ánægju af skógarferð,
þ.e. ferð í Naustaborgir eins og í fyrra.
Hugmyndin er sú að við biðjum ykkur um að koma börnunum ykkar að Naustaborgum að morgni þriðjudagsins 7.júní
Þar áætlum við að dvelja fram eftir degi, kynna okkur náttúruna, borða , leika okkur, og koma síðan aftur í leikskólann með strætó eftir hádegi eða milli kl. 13 og 14(heimferð ákveðin með tilliti til veðurskilyrða).
Viðbrögð vel þegin.
Kveðja
Ólöf, Sigþóra og Hobba
 

Vorönn
Með hækkandi sól, hugurinn rís ;)
Nú á vorönn erum við að vinna með dygðina Virðingu.
Dygðavísar eru komnir í hólf og gott að renna yfir þá svona til að glöggva sig aðeins ;)
Mikilvægt er að við sýnum öllu fólki Virðingu. Einkalíf okkar væri fótum troðið væri Virðingu ekki til að dreifa. Án Virðingar töluðum við ruddalega hvert við annað og kæmum fram við aðra eins og þeir skiptu okkur engu máli. Án sjálfsvirðingar mundum við leyfa öðrum að nota okkur eða særa.
Virðing felur í sér að við tjáum okkar skoðanir, virðum skoðanir annarra og gerum okkur grein fyrir að oft má líta á mál frá fleiri en einu sjónarhorni.
Mikilvægt er að hafa Virðingu ávallt að leiðarljósi í samskiptum við annað fólk.
Kveðja kennarar Álfadeild.
 

Haustönn
Vinsemd er dygðin okkar nú í haust. Við þurfum öll (kennarar, foreldrar, börn) að minna okkur reglulega á og tileinka okkur þau góðu gildi sem skapa Vinsemd á milli fólks. Það að eiga góðan vin, fá að tilheyra hópi á eigin forsendum og leyfa öðrum að njóta þess sama er mikilvægur þáttur í jákvæðum samskiptum. Dygðin verður rauður þráður í leikskólastarfinu og verður hvert tækifæri nýtt sem gefst til að ræða um Vinsemd, notum orð sem tilheyra Vinsemd, lesum bækur og syngjum söngva og ekki má gleyma því að æfa sig í daglegum samskiptum.
Við hlökkum til samstarfsins í haust og að vinna með þessa mjög svo mikilvægu dygð.
Kveðja kennarar Álfadeild.